I Live My Life For You

She could resist temptation from men like Orion. Pero mukhang si Orion ang kryptonite niya.

Nang makaligtas sa paglubog ng bangkang sinasakyan sa Guimaras, nagdesisyon si Ratchelle na umuwi sa Isla La Carmella. Aayusin niya ang relasyon sa mga magulang at pakakasalan ang unang lalaking minahal niya—si Vic-vic. Pero sa gabing nakatakda na niyang sabihin kay Vic-vic ang pagmamahal para dito, inanunsiyo naman nito ang pagpapakasal sa kontrabida niyang pinsan na si Joanne Jean.

Wasak na wasak ang mundo ni Ratchelle nang gabing iyon. At paggising kinabukasan, katabi na niya si Orion—ang mortal niyang kaaway. Gusgusin ito at mukhang hindi naliligong artist na sikat na sikat sa buong La Carmella. Underwear lang ang suot niya at hindi niya alam kung ano ang nangyari sa kanila.

Kunwari ay patay-malisya na lang siya at tinakasan si Orion para iwasan ang komprontasyon. Pero hindi niya ito magawang takasan nang kumalat sa buong La Carmella ang tungkol sa isang gabing “pagkalimot” nila. Kailangang ibangon ni Orion ang puri niya kung ayaw niyang masira ang reputasyon sa mga magulang.

Pero hindi lang puri ni Ratchelle ang plano nitong ibangon. Plano rin ni Orion na paghilumin ang sugat sa puso niya. Lalabanan ba ni Ratchelle ang nararamdaman o bibigay na lang?