Daniel no peirao

(Fene, 1972). Paula Carballeira Cabana (Contadoris absurdus). Animal da especie dos faladores, moi común en zonas de chuvia. Adoita abrir a boca para contar historias e limpar ben as orellas para escoitalas onde queira que vaia. Gústalle comer e viaxar. Das súas diferentes viaxes pódense encontrar datos en A percura, Robin e a Boa Xente, Troulas, andainas, solpores e unha farsa anónima e Mateo. A súa viaxe máis recente foi a África, ás aldeas Mangalas. As últimas noticias que se teñen dela din que está a preparar unha excursión extraterrestre.

Reside en Santiago de Compostela dende 1989, onde estudou Filoloxía Hispánica. Escribe relatos infantís e xuvenís, e pertence á compañía de teatro Berrobambán. En 2006 foi a primeira gañadora do Premio Manuel María de Literatura Dramática Infantil, galardón creado polo IGAEM, pola súa obra Boas noites, e en 2011 gañou o Premio Manuel María de Literatura Dramática Infantil por O refugallo.

Publicou diversas obras, entre as que destacan Olo-iepu-iepu (1999), A era de Lázaro (2004), Contatrás (2006), O lobishome de Candeán (2009), As outras historias (2011), entre outras.