ജീവിതഗന്ധിയും ഹൃദയസ്പർശിയുമായ പതിനൊന്നു ചെറുകഥകളുടെ സമാഹാരമാണ് ഡോ. ബിജു ജോൺ രചിച്ചിരിക്കുന്ന ‘പാലപ്പൂ മണമുള്ള പകലിരവുകൾ.’ വായനക്കാരന്റെ മനസ്സിൽ വല്ലാത്ത വിങ്ങലും നോവിന്റെ അലകളും അവശേഷിപ്പിക്കുന്ന കഥകൾ.

ആതുരസേവന രംഗത്തു പ്രവർത്തിക്കുന്ന വ്യക്തി എന്ന നിലയിൽ സ്വന്തം അനുഭവ പരിസരങ്ങൾ പല കഥകളിലും വിഷയീഭവിക്കുന്നുണ്ടെങ്കിലും ഒന്നിനൊന്നു വ്യത്യസ്തമായ പ്രമേയങ്ങളാണ് ഈ സമാഹാരത്തിന്റെ ഏറ്റവും വലിയ സവിശേഷത. നമ്മെ ചിരിപ്പിക്കുകയും കരയിക്കുകയും ഇരുത്തിച്ചിന്തിപ്പിക്കുകയും ചെയ്യുന്ന കഥകൾ ഏറെ ഹൃദ്യവും ലളിതവുമായ ഭാഷയിലാണ് കഥാകൃത്ത് അവതരിപ്പിച്ചിരിക്കുന്നത്.

ദുരന്താനുഭവങ്ങളിലൂടെ സ്ഫുടം ചെയ്തെടുക്കപ്പെടുന്ന ജീവിതങ്ങളുടെ നേർക്കാഴ്ചയാണ് 'തെരേസ'. യുക്രൈനിന്റെ ദുരന്തപൂർണ്ണമായ പശ്ചാത്തലത്തിൽ എഴുതപ്പെട്ടിരിക്കുന്ന ഈ മനോഹര സൃഷ്ടി ഒരു സിനിമ കാണുന്ന പ്രതീതി നമ്മളിൽ ഉളവാക്കുന്നു. 'ഗുഡ്ബൈ'യും 'ഒരു വടക്കൻ പ്രണയഗാഥ'യും മനുഷ്യബന്ധങ്ങളിലെ കാപട്യവും സ്വാർത്ഥതയും തുറന്നുകാട്ടുമ്പോൾ 'ഗെറ്റ് ടുഗദർ', 'പൂജ', 'ലൗ ഇൻ ദ ടൈം ഓഫ് കൊറോണ' തുടങ്ങിയ കഥകൾ നിസ്വാർത്ഥ സ്നേഹത്തിന്റെ ഉൽകൃഷ്ട നിദർശനങ്ങൾ തന്നെയാണ്. 'ദയ'യും 'പ്രണയനിലാവും' നമ്മുടെ ഹൃദയാകാശങ്ങളിൽ ആർദ്ര സ്നേഹത്തിന്റെ നിലാവു പൊഴിക്കുന്നു. തികഞ്ഞ നർമ്മബോധത്തോടെയുള്ള അവതരണം വായനാനുഭവത്തെ കൂടുതൽ ആസ്വാദ്യമാക്കുന്നുണ്ടെന്നതിൽ സംശയമില്ല.

നമ്മുടെ സാമൂഹിക ജീവിതത്തിന്റെ ഒരു പരിച്ഛേദം തന്നെയായ ഈ കൃതി മികച്ചൊരു വായനാനുഭവം സമ്മാനിക്കുന്നു എന്ന് പറയുന്നതിൽ ഞങ്ങൾക്ക് ഏറെ സന്തോഷമുണ്ട്. തിരക്കു പിടിച്ച ഔദ്യോഗിക ജീവിതത്തിനിടയിലും ഡോ. ബിജു ജോൺ നടത്തുന്ന സാഹിത്യ പരിശ്രമങ്ങൾക്ക് അഭിനന്ദനങ്ങളും സർവ്വവിധ ആശംസകളും നേരുന്നു.

പ്രസാധകർ